पुणे : गेल्या काही वर्षांमध्ये पुण्यातील निवासी रिअल इस्टेट बाजारात लक्षणीय बदल पाहायला मिळत आहेत. विशेषतः प्रीमियम आणि मोठ्या घरांकडे घरखरेदीदारांचा कल वाढताना दिसत आहे. बदलती जीवनशैली, घरातून काम करण्याची पद्धत (वर्क फ्रॉम होम) आणि अधिक आरामदायी जीवनमानाची अपेक्षा यामुळे प्रशस्त व सुविधांनी युक्त घरांची मागणी सातत्याने वाढत आहे.
रिअल इस्टेट क्षेत्रातील उपलब्ध आकडेवारीनुसार, पुण्यातील निवासी प्रकल्पांमध्ये उच्च श्रेणीतील घरांची मागणी मागील काही महिन्यांमध्ये लक्षणीयरीत्या वाढली आहे. विशेषतः १ कोटी ते २.५ कोटी रुपयांच्या दरम्यानच्या घरांमध्ये खरेदीदारांचा कल अधिक दिसून येत आहे. शहरातील विकसित होत असलेले पायाभूत प्रकल्प, मेट्रो कॉरिडॉर, रिंग रोड तसेच आयटी आणि औद्योगिक क्षेत्रातील वाढ यामुळे पुणे हे गुंतवणूक आणि निवासासाठी अधिक आकर्षक ठरत आहे.
गोयल गंगा डेव्हलपमेंट्सचे संचालक अनुराग गोयल यांनी सांगितले की, आजचा घरखरेदीदार केवळ राहण्यासाठी घर शोधत नाही, तर उत्तम जीवनशैली देणारा प्रकल्प निवडत आहे. प्रशस्त घरे, उत्तम लोकेशन, आधुनिक सुविधा आणि विश्वासार्ह डेव्हलपर हे घटक खरेदीचा निर्णय घेताना महत्त्वाचे ठरत आहेत.
ते पुढे म्हणाले, “पुण्यातील रिअल इस्टेट बाजार अधिक परिपक्व होत आहे. पायाभूत सुविधांमध्ये होणारी गुंतवणूक आणि शहराच्या विविध भागांमध्ये होणारा विकास यामुळे प्रीमियम घरांची मागणी आगामी काळात आणखी वाढण्याची शक्यता आहे. त्यामुळे गुणवत्तापूर्ण प्रकल्प विकसित करण्यावर डेव्हलपर्सचा भर वाढत आहे.”
पुणे शहराचा वेगाने होत असलेला विकास, रोजगाराच्या वाढत्या संधी आणि उत्तम कनेक्टिव्हिटी यामुळे शहरातील रिअल इस्टेट बाजार मजबूत होत असून, प्रीमियम आणि मोठ्या घरांच्या सेगमेंटमध्ये भविष्यातही सकारात्मक वाढ अपेक्षित आहे.
